Wurmlinger
Narrenmarsch
Wenn d’Hase
bached Fasnetküechle,
ganze grauße Krätte voll,
und Narre winket, mit m’Tüechle,
das die Fasnet komme soll
No juzgerets
und pfuzgerets
Und älles ischt verruckt,
wer etz it närrsch und hoorig ischt,
dem geit de Bock en Ruck!
„Fasnetsnarre kugelrund,
d’Fasnet mached älle gsund!“
Vom Seltl
rueft sell Krattaweible:
„ Hansele zie d’Maschker a
de Buure traget raute Leible
närrisch ischt etzt Weib und Ma!
No schäpperets
und klepperets,
und älles isch verruckt,
wer etz it närrsch und hoorig ischt,
dem geit de Bock en Ruck!
„Fasnetsnarre kugelrund,
d’Fasnet mached älle gsund!“
Wenn d’Musik
spielt und d’Narreschelle
klinglet, dass mer tanze mueß,
no lupfet,ob se au it wöllet
älle Maidle Rock und Fueß!
No pluderets
und pfluderets
und älles isch verruckt,
wer etz it närrsch und hoorig ischt,
dem geit de Bock en Ruck!
„Fasnetsnarre kugelrund,
d’Fasnet mached älle gsund!“
|